<$BlogRSDUrl$>

2015-01-03

Le notion del frigido es relative - traduction del hungaro a in interlingua per Péter Kovács 



Le notion del frigido es relative

- traduction del hungaro a in interlingua per Péter Kovács


  

+25 °C: Le grecos mitte lor pullovers (si illes los trova)
+20 °C: Le jamaicanos connecte le calefaction (si illes lo ha).
+15 °C: Le americanos treme del frigido, le russos planta cucumbres in lor jardinettos.
+5 °C: Le respiramento de uno ja se vide. Le autos italian non plus functiona.
0 °C: In America le aqua gela, in Russia illo deveni solmente plus dense...
-5 °C: Le autos francese non plus functiona...
-10 °C: Le catto insiste dormir con te in le lecto. Le norvegianos cerca lor pullovers.
-15 °C: In Oslo on connecte le calefaction, le russos viagia a lor casas de weekend le ultime vice in le saison.
-20 °C: Le autos american non plus functiona.
-25 °C: On non pote functionar le autos german, le jamaicanos se extingueva.
-30 °C: Le autoritates parla super le question del homelesses, le catto dormi in tu pyjamas.
-35 °C: Il es troppo frigide a pensar. On anque non pote functionar le autos japonese.
-40 °C: Le autos svedese anque cessa functionar.
-45 °C: Le traffico ja non functiona in Europa, le russos mangia ancora gelatos.
-50 °C: Esque vive ancora grecos...?!
-55 °C: Le cilios gela inter duo oculamentos. In Alaska on claude le fenestrettas del cameras de banio.
-60 °C: Le ursos blanc migra verso le Sud.
-70 °C: Mesmo le inferno gela.
-75 °C: Le finneses salva Sancte Nicolaus de Lapponia, le russos vesti lor bonettos asinin.
-80 °C: Le russos non leva lor guantos mesmo durante plenar le vitros per vodka.
-115 °C: Le alcohol gela e le russos es multissimo irate...!

 

2010-02-12

Lingua nederlandese ancorate in constitution 

Le lingua nederlandese essera includite in le Constitution del Paises Basse. Le consilio de ministros ha decidite isto a proposition del ministro Ter Horst del Interior e del Relationes del Regno, assi que in le nomine del prime ministro Balkenende, del ministro Hirsch Ballin de Justitia, e del ministro Plasterk de Inseniamento, Cultura e Scientia. In le Constitution essera fixate que le nederlandese es le lingua official del pais e que le governamento promove le uso del nederlandese. Un ordinantia super le lingua frison essera equalmente inserite in le Constitution.

Le cabinetto considera que le lingua nederlandese es un parte importante del cultura nederlandese. Como consequentia del internationalisation e del composition pluriforme del population, de plus in plus linguas es parlate in Nederlandia. Specialmente le anglese gania terreno. Le cabinetto lo considera importante que le uso del lingua nederlandese non es negligite. Le proposition pro modificar le Constitution debe garantir que le lingua nederlandese va servir ubique in Nederlandia. Le ordinantia in le Constitution super le lingua frison garanti le position legal que le frison possede ja hodie.

Le consilio de ministros ha approbate que le proposition de lege essera inviate pro consilio al Consilio de Stato. Le texto del proposition de lege e del consilio del Consilio de Stato devenira public al momento de lor presentation al Secunde Camera.

(Origine: communicato de pressa del governamento nederlandese.)

Labels: , , , ,


2009-12-19

Eruption vulcanic submarin capturate in film 

Scientistas ha potite observar in directo le eruption vulcanic subaquatic le plus profunde in le historia, complete con lava fundite e fumo de sulfure.

Un robot submarin statounitese filmava le eruption plus de 1,2 kilometros sub le superficie del Oceano Pacific, in le vicinitate de Samoa, durante un expedition in maio de iste anno.

Le reporto de CNN include un curte video de iste registration.


2009-12-09

Le chauffeur credule era inviate a in le riviera per un GPS 

In Germania un auto plen de passageros cadeva in un riviera a transverso le dock de ferry-boats. Le chauffeur sequeva le instructiones del systema de navigation (GPS).

Malgrado que le chauffeur cognosceva le ambiente, un auto cadeva a in le riviera presso Offenbach, Germania, habente sequite le instructiones false del systema navigational. Le cinque passageros attingeva le ripa fortunatemente e depois le pumperos portava le auto tamben al superficie.

Le caso non es unic: recentemente in novembre, anque in Germania un accidente occurreva proque le chauffeur credeva plus tosto al GPS que a su proprie oculos. A causa de isto ille rumpeva su auto plenmente, collidente al barriera stratal.


2009-06-16

Un meteorite vulnerava un puero 

Un meteorite del grandor de un piso grattava un puero de 14 (dece-quatro) annos in Germania e faceva un cavo de 30 cm (trenta centímetros) de largor in le asphalto presso le infante. Le puero hastava al schola in le urbe Essen, quando ille remarcava un bolletta de foco sur le celo, que se approchava directemente verso ille. In le sequente momento un dolor acre trenchava in su bracio e se audiva un explosion grandissime, como le tonitro de un fulmine. In le bracio del puero le “malediction celeste” causava un vulnere de 8 (octo) cm de longor e le aures del infante sibilava mesmo plure horas postea. Altere problemas ille non habeva; ille habeva un grandissime infortuna, al mesme tempore nonobstante anque un grandissime fortuna. A saper: le chance de uno de esser colpate per un meteorite es 1 a 100 (un a cento) milliones. Le analyse chimic del meteorite provava, que le petra arrivava del spatio – informava le agentia britannic Ananova.

2009-02-20

2500 linguas in periculo 

Circa 2500 linguas human es in periculo plus o minus grave de morir, dice UNESCO in le nove edition de su Atlas de linguas in periculo in le mundo (francese; espaniol; anglese), annunciate in Paris jovedi le 19 de februario, duo dies ante le Die International del Lingua Materne.

In 2001, ‘solmente’ 900 linguas esseva menaciate, ma le grande augmento de iste numero es probabilemente debite a un melioration del methodos de investigation plus tosto que un deterioration real.

Le tres paises con le plus grande numero de linguas menaciate es India (196), le Statos Unite (192) e Indonesia (147). Quasi 200 linguas del mundo ha dece o minus parlatores.


2008-10-06

Kouchner regretta error de pronunciation 

Le dominica passate, le governamento francese ha debite corriger un remarca del ministro de affaires estranier Kouchner. A causa de su forte accento francese, su parolas esseva publicate incorrectemente in le pressa israeli.

Un jornal diceva que Israel "mangiarea" Iran, si Iran haberea un arma nuclear. Kouchner usava le parola anglese "hit" (colpar, attaccar), ma lo pronunciava de modo francese, sin 'h' e con un 'i' longe.

Le jornalistas israeli audiva 'eat' (mangiar) e publicava un notitia de illo. Koucher ha indicate que ille multo regretta le miscomprension e ha offerite excusas.

Como notava un del commentatores sub le articulo ligate, nos debe probabilemente considerar nos fortunate que iste jornalistas non intendeva 'heat' (calefacer).


2008-05-26

Le registration audio le plus vetule del mundo es discargabile 

Totevia non Edison faceva le prime registration auditive del mundo. A saper: le francese Scott de Martinville le precedeva per 17 (dece septe) annos – il es ver, ille non poteva controlar su registration.

Secundo le universitate scientific francese le canto folkloric „Mary Had a Little Lamb” registrate per Thomas Alva Edison totevia non es le prime registration auditive del mundo. A saper: un imprimitor parisian, Edouard-Leon Scott de Martinville registrava un pecia de 10 secundas le 9 de april 1860 (mille octo centos sexanta), ancora in le tempore de Napoleon le 3tie (tertie).

Le apparato de Martinville nominate phonautographo grattava le undas sonic sur papiro nigrate per le fumo del lampa de oleo. Ben que ille precedeva Edison per 17 annos in le registration, al contrario de ille Martinville non poteva como a controlar, ascoltar le sonos immagazinate per sulcos cavate in papiro.

Solo le historicos e mixers sonic del projecto american First Sounds, occupante se con archivar e salvar registrationes sonic era capace de facer isto, applicante certe methodos de elaborar imagines digital. Le registration, que contine un pecia del canto folkloric francese „Au clair de la lune” es attingibile in formato mp3 sur le sito de First Sounds.

(Traduction de hungaro del pagina web http://hvg.hu )


2007-05-01

Linguage human disveloppava per gestos 

Recercatores statounitese ha trovate forte evidentia que simias primate se communica con gestos.

Analysante le modo in que duo species de primates produce gestos con lor manos, bracios e gambas, le scientistas determinava que lor gesticulation es plus flexibile que lor expressiones facial e vocal.

Le capacitate de apprender gestos distingue le primates de altere simias e del major parte del species animal in existentia, dice Frans de Waal, membro del equipa de recercatores.

Le trovatas supporta le theoria que le linguage human se disveloppava per le uso de gestos manual.


2006-09-25

CE establi gruppo pro multilinguismo 

Le Commission Europee ha decidite a establir un Gruppo a nivello alte super le Multilinguismo. Le prime incontro formal del gruppo habera loco le 3 de octobre 2006.

"Io ha petite al Gruppo de considerar un varietate de themas que cade foras del mandato habitual del gruppos governamental de expertos super le linguas", diceva le commissionero Ján Figel, lanceante le gruppo. "Iste themas include le ligamines inter linguas e recerca, linguas e le medios de communication, linguas pro commercio, le uso de nove technologias pro le traduction e interpretation e strategias pro promover le apprendimento de linguas."


2006-02-16

Interramento con un error 

 

Le morite telephonava durante su interramento

Beograd (mti) - Processo menacia un interprenditor de interramentos in Serbia...

...malgrado que le homine in question organisava toto accuratemente, ille mesmo appellava le relatives in America a casa; dicente, que le capite de lor familia, oncle Bogoljub Topalović, 84 annos decedeva in le hospital. Ma postea in le momento final, durante le placiamento del sarcophago in le fossa le morite telephonava a su filia, criticante que nemo le visita in le hospital ja desde plure dies.

Un parte del lugentes rideva, le altere plorava - a causa del furor. Le examine verificava: un infirmera in le hospital era culpabile; quando un altere homine malade decedeva, illa confundeva le nomines, proque illa se hastava tanto pro informar le interprenditor de interramentos, a fin que illa recipe de ille le percentage usual.


2006-01-06

Le balenas parla differente linguas 

 

Le balenas parla "in differente linguas"; assi le mammales maritime del Pacifico a pena comprende lor co-racianos vivente in le Oceano Atlantic; e le balenas habitante al costas de Chile pote difficilemente arrivar a "denominator commun" con le balenas vivente presso le Polo Sud.

David Mellinger, explorator del universitate in le stato Oregon del SUA studiava le tonos producite per le balenas del Pacifico e illos del gigantesc balenas con ambergris. Le "spionar" deveniva possibile per le systema registrante seismos installate sub le aqua, que registrava tamben le conversation del mammales maritime - se lege sur le portal russe de novas "Lenta".

Como il se verificava, le "parlar" del mammales maritime consiste de ruitos, sibilos e tonos susurrante de alte frequentia, ma le specimenes del population nordic e del sud "misce" le tonos in differente proportiones e tamben le frequentia del "parlar" pote ser differente.

Le mammales maritime usa un parte del tonos pro orientation, ma le altere partes pro communication. Le explorator registrava le plus complicate "melodias" durante le epocha del copulation.

(agentia de novas MTI, rubrica Panoráma)


2005-09-07

Qui esseva le effractor? 

 

Version audio (mp3)

Hamburg (mti) – Le policieros ha capturate un effractor causante seriose damnos in un appartamento. In le unitate local del policia le alarmator del appartamento signava, que occurreva un entrata inautorisate. Le patrulia videva, que le texturas de plure mobiles e le cortinas obscurante del fenestras esseva rumpite in partes per un delinquente incognoscite, de plus esseva rumpite un aquario, cuje pisces jaceva sin ordine in le appartamento. Finalmente on trovava le delinquente sub le pulpito del cocina: illo esseva un catto robuste.

 


2005-08-18

Sanguine de crocodilo contra le virus VIH? 

 

Version audio (mp3)

Sydney (mti) – Le sanguine de crocodilo occide le virus VIH – a iste conclusion veniva le recercatores del Parca Darwin de Crocodilos al parte tropic de Australia Nordic explorante le sanguine del reptile. Per iste discoperta pote devenir possibile le disveloppamento de un nove antibiotico. Le systema immun del crocodilo es multo plus forte que illo del homine e illo es multo plus resistente contra le infectiones periculose, contra le vulneres grave. On faceva le prime explorationes del systema immun per crocodilo in 1998 e se verificava que le anticorpore in le corpore del reptile occide le bacterios – annunciava Adam Britton, scientista australian, qui ha narrate que si on adde sero de crocodilo a sanguine infectate per VIH illo face un multo plus grande effecto que le sero human; illo quasi devora le majoritate del viruses VIH.

 


2005-05-24

Le nomine del village esseva mislegite 

 

Version audio (mp3)

In Brasil le policia ha devastate per inadvertentia un plen village per bulldozers. Le septanta policieros debeva destruer un altere village a distantia de octo kilometros secundo un ordine judicial, proque le colonia esseva construite illegalmente.

 


Interlingua de IALA
Circulo de Interlingua
This page is powered by Blogger. Isn't yours?