<$BlogRSDUrl$>

2003-07-23

Prominentes de Al Qaeda detenite in Iran 

Version audio: 277kB QuickTime

Un numero del leaders plus prominente del rete terroristic Al Qaeda se trova in detention in Iran.

Isto ha admittite le ministro iranian de Information post assertiones per le presidente statounitese Bush que Iran sia un refugio pro terroristas.

Iran nega le accusation e insiste que tote le terroristas essera judicate in Iran o extradite a lor paises de origine.


Microsoft ha un problema patente 

Le multinational de software Microsoft ha suffrite un disfacta essential in un audition ante-judicio concernente infraction de patentes. Isto ha reportate le periodico financiari Fortune.

Un micre interprisa nominate InterTrust, ora in possession juncte de Philips e Sony, assere haber disveloppate le technologias controversial de 'computation digne de fide' e de 'gestion digital de derectos', que figura prominentemente in le strategia de Microsoft pro le disveloppamento de su systema operative, Windows.

Microsoft sta accusate de violar le patentes de InterTrust super iste technologias. In le audition, le gigante ha volite preventar un judicio super le question, arguente que phrases crucial in le patentes de InterTrust sia troppo vage pro esser capace de application, e que alteres sia troppo limitate de scopo.

Le judice ha rejectate iste argumento, e Microsoft va ora tentar attinger un accordo financiari extra-judicial con InterTrust.


2003-07-22

Incendio in Turre de Eiffel 

Turre de Eiffel, vidite ab infra

Un incendio proxime al summitate del Turre de Eiffel in Paris (Francia) esseva extinguite brevemente post erumper iste vespere.

Le incendio causava panico inter le touristas, ma nulle persona esseva vulnerate.

Le interprisa-operator del Turre ha confirmate que le incendio habeva loco in un nivello superior con installationes technic. Le nivello non es aperte a visitatores.


Filios de Saddam morte? 

Le duo filios de Saddam Hussein, Uday e Qusay, ha possibilemente morite in combattimentos in le citate de Mosul.

Un truppa statounitese de circa 2000 ha assalite un domo, in que il esseva credite celar se alliatos prominente del ex-dictator. Cinque irakianos esseva occidite durante le battalia de cinque horas.

Secundo un functionario del armea statounitese, il ha un multo bon chance que le filios de Saddam esseva in le domo. Duo corpores trovate resimilava fortemente le filios.


2003-07-21

Europa contra spam 

Version audio: 476kB QuickTime

Le Commission Europee ha instruite al statos-membros del UE bannir le e-mail in massa non requestate ('spam') ante le veniente octobre.

Ben que remane a resolver questiones difficile de como proscriber spam effectivemente, le portavoce europee de telecommunicationes Per Haugaard ha dicite in un interview con Radio Nederlandia que spam ha devenite tanto enoiose, costose, e abundante que action es necessari.

"Iste legislation [...] da al usatores e companias le clar base legal, o certitude legal, de persequer le spammatores, e al providitores de servicio Internet de installar filtros a fin que lor clientes non recipera tote le spam que illes ha recipite usque hodie", diceva Haugaard.

Le effecto de legislation sol remane questionabile tanto longe que le vaste majoritate del spam es de origine extra-europee. Haugaard comprende isto: "Le legislation es un elemento, ma solmente un elemento. Le altere parte es, naturalmente, le industria. Illes debera ora introducer le solutiones technologic."


2003-07-20

Autopsia monstra suicidio de David Kelly 

Version audio: 464kB QuickTime

Le policia britannic dice que il ha pauc dubita que le experto de armas David Kelly se ha suicidate. Kelly scribeva un reporto controversial allegante que le governamento britannic ha exaggerate le informationes super le armas de destruction massive de Irak.

Un autopsia ha monstrate que Dr. Kelly (59) ha sanguinate a morte per un fissura in le carpo. Non longe ab su domicilio in Oxfordshire, su corpore esseva trovate venerdi, proxime a un cultello e medicamentos anti-dolor.

Le suicidio ha causate un intensivation del criticismos contra le governamento britannic quanto al rationamento pro entrar in guerra contra Irak. Un visita a Japon del prime ministro Tony Blair ha essite completemente dominate per le tragedia.


2003-07-18

Blair defende guerra 

Adressante le Congresso del Statos Unite, le prime ministro britannic Tony Blair ha defendite le guerra in Irak, dicente que le historia pardonara le e le presidente statounitese George W Bush, etiam si nulle armas de destruction massive essera trovate.

Ille continuava laudante le postura dur del Statos Unite contra le terrorismo international, e addeva que le poter del pais non ha jammais essite tanto necessari o mal comprendite. Le Congresso respondeva con applauso.

Le duo leaders habeva incontrate se anteriormente in le Domo Blanc. Ben que le thema del discussion esseva le reconstruction post-guerra de Irak, le incontro esseva eclipsate per le continue attaccos contra le credibilitate del rationamento original del guerra, le allegate armas de destruction massive in possession de Irak.

Illustrativemente, un pagina-burla, que ha le aspecto de un standard error 404 (pagina non trovate) de Microsoft, ha devenite un del sitos plus popular de internet.

"Iste armas de destruction massive non pote esser monstrate", annuncia le message. "Le pais ha possibilemente difficultates technic, o vos necessita possibilemente adjustar vostre mandato de inspector de armas."


Interlingua de IALA
Circulo de Interlingua
This page is powered by Blogger. Isn't yours?